शैक्षणिक सहकार्य आणि विद्यार्थी/शिक्षक आदान-प्रदान कार्यक्रमाअंतर्गत महाराष्ट्र एज्युकेशन सोसायटीच्या विविध शाखांमध्ये काम करणाऱ्या सात शिक्षिका आणि समुपदेशक मंगळवार, दि. १५ मे २०१८ रोजी जम्मू-काश्मीरला जात आहेत. संस्थेच्या मुख्य कार्यालयात आज झालेल्या एका छोटेखानी कार्यक्रमात संस्थेच्या नियामक मंडळाचे अध्यक्ष राजीव सहस्रबुद्धे यांच्या प्रमुख उपस्थितीत त्यांना शुभेच्छा देण्यात आल्या. या वेळी संस्थेचे चिटणीस डॉ. संतोष देशपांडे, या उपक्रमाचे संयोजक व संस्थेच्या आजीव सदस्य मंडळाचे सदस्य विनय चाटी, या उपक्रमाचे अन्य एक संयोजक डॉ. रवींद्र वैद्य, संस्थेचे मुख्य कार्यकारी अधिकारी सचिन आंबर्डेकर आणि विवेक व्यासपीठचे कार्यवाह महेश पोहनेरकर आदी मान्यवर उपस्थित होते. 

जम्मू-काश्मीरमधील कठुआ जिल्ह्यातील ददवारा तालुक्यात पिंतर या गावी बाल गोविंद स्कूल आहे. सध्या या शाळेत ६५० विद्यार्थी शिक्षण घेतात. महाराष्ट्र एज्युकेशन सोसायटी आणि बाल गोविंद स्कूल यांच्यादरम्यान विद्याभारतीच्या माध्यमातून सन २०१३-१४ पासून शैक्षणिक सहकार्य आणि विद्यार्थी/शिक्षक आदान-प्रदान कार्यक्रम राबविण्यात येत आहे. या वर्षी ‘मएसो’च्या श्रीमती रेवा देशपांडे, श्रीमती ममता येरनूले, श्रीमती सुलभा घैसास, डॉ. गिरीजा लिखिते, श्रीमती मनिषा दोशी, श्रीमती वर्षा न्यायाधीश आणि श्रीमती वैशाली कामत अशा सात शिक्षिका व समुपदेशक या शाळेत जात आहेत. तेथील विद्यार्थ्यांना त्या इंग्रजी, विज्ञान, गणित या विषयांचे नावीन्यपूर्ण पद्धतीने आणि कार्यानुभवावर आधारित शिक्षण देणार आहेत. त्यासाठी या शिक्षकांनी बाल गोविंद स्कूलमधील अभ्यासक्रमाचा अभ्यास केला असून सोप्या पद्धतीने कसे शिकविता येईल? याचा विचार केला आहे. अभ्यासक्रमाशी निगडित कार्यानुभवांबरोबरच (Activity) विविध नावीन्यपूर्ण कार्यानुभव तयार केले आहेत. त्यामध्ये विज्ञान आणि गणित विषयांप्रमाणेच पाठ्यक्रम निरिक्षणाच्या आधारे काही कार्यानुभव तयार केले आहेत. त्यामध्ये वक्तृत्व, एखाद्या विषयावर मुद्देसूद चर्चा कशी करावी आदी कौशल्ये शिकवण्यात येणार आहेत. त्याशिवाय विद्यार्थी-पालक-शिक्षक यांना समुपदेशन करण्यात येणार आहे. या शाळेत ‘व्हर्चूअल क्लासरूम’ तयार करण्याचा प्रयत्न देखील करण्यात येणार आहे. 

विद्यार्थी/शिक्षक आदान-प्रदान कार्यक्रमाअंतर्गत येत्या जून महिन्यात बाल गोविंद स्कूलमधील दहा विद्यार्थिनी ‘मएसो’च्या राणी लक्ष्मीबाई मुलींची सैनिकी शाळेत येणार आहेत.

पुणे – ‘शौर्य’ शिबिरामुळे आत्मविश्वास वाढला आणि साहसी वृत्तीला प्रोत्साहन मिळाल्याचे मनोगत ‘शौर्य’ शिबिराच्या समारोपप्रसंगी शिबिरात सहभागी झालेली मुले-मुली व त्यांच्या पालकांनी व्यक्त केले. 

म.ए.सो.राणी लक्ष्मीबाई मुलींची सैनिकी शाळेत शनिवार, दि. ५ मे २०१८ ते शनिवार, दि.१२ मे २०१८ या कालावधीत ‘शौर्य’ साहसी क्रीडा प्रशिक्षण आयोजित करण्यात आले होते. या शिबिराचा समारोप शनिवार, दि.१२ मे २०१८ रोजी उत्साहात पार पडला. मएसो गरवारे वाणिज्य महाविद्यालयाचे प्राचार्य डॉ. आनंद लेले या कार्यक्रमाचे प्रमुख पाहुणे होते. शाला समितीच्या अध्यक्षा डॉ. माधवी मेहेंदळे, मएसो क्रीडावर्धिनीचे समन्वयक शैलेश आपटे, शाळेच्या माजी विद्यार्थिनी मेजर अर्चिस सबनीस व स्क्वॉड्रन लीडर वैष्णवी टोकेकर यावेळी उपस्थित होते. 

‘शौर्य’ शिबिरातून फक्त साहसी वृत्ती वाढीस न लागता संस्काराची जोपासना केली जाते असे प्रमुख पाहुणे डॉ. आनंद लेले यांनी आपल्या भाषणात सांगितले. तर या शिबिरातून विविध प्रकारच्या साहसाबरोबर कलांची तोंडओळख करून दिली, असे डॉ.माधवी मेहेंदळे यांनी सांगितले. 

शिबिरप्रमुख प्रशांत जोशी यांनी कार्यक्रमाचे प्रास्ताविक केले. शाळेचे कमांडंट कर्नल सारंग काशीकर यांनी पाहुण्यांचा परिचय करून दिला. शाळेच्या मुख्याध्यापिका पूजा जोग यांनी आभार मानले. उपमुख्याध्यापक अनंत कुलकर्णी यांनी कार्यक्रमाचे सूत्रसंचालन केले.

आपल्या संंस्थेचे मा.अध्यक्ष एअर मार्शल भूषण गोखले (निवृत्त) यांची विश्व मराठी साहित्य संमेलनाच्या अध्यक्षपदी निवड झाली आहे. येत्या सप्टेंबर महिन्यात अबूधाबी येथे होणाऱ्या या संमेलनाचे हे आठवे वर्ष आहे.

जिद्द आणि उच्च ध्येय हाच यशाचा मार्ग – मेजर जनरल शिशिर महाजन (निवृत्त)

पुणे, दि. ५ – “जीवनात यशस्वी होण्यासाठी लहानपणापासूनच परिश्रम, जिद्द, चिकाटी, स्वावलंबन या गुणांचा अबलंब करून उच्च ध्येय ठेवावे” असा सल्ला मेजर जनरल शिशिर महाजन (निवृत्त) यांनी आज येथे दिला. महाराष्ट्र एज्युकेशन सोसायटीच्या राणी लक्ष्मीबाई मुलींची सैनिकी शाळेत आयोजित करण्यात आलेल्या ‘शौर्य’ या साहसी क्रीडा प्रशिक्षण शिबिराचे उद्घाटन मेजर जनरल महाजन (निवृत्त) यांच्या हस्ते झाले, त्यावेळी महाजन बोलत होते. 

महाराष्ट्र एज्युकेशन सोसायटीच्या नियामक मंडळाचे अध्यक्ष राजीव सहस्रबुद्धे, संस्थेचे सचिव डॉ. संतोष देशपांडे, संस्थेच्या आजीव सदस्य मंडळाचे सदस्य प्रा. सुधीर भोसले, डॉ. अतुल कुलकर्णी, शाळेच्या महामात्रा डॉ. मानसी भाटे, शाळेच्या प्राचार्या सौ. पूजा जोग, कमांडट कर्नल सारंग काशीकर (निवृत्त) या वेळी व्यासपीठावर उपस्थित होते. 

आपल्या अध्यक्षीय भाषणात राजीव सहस्रबुद्धे यांनी, शिबिरार्थींनी या शिबिरातून उत्तम संस्कार, उत्तम सैनिकी गुण प्राप्त करावेत आणि शारीरिक तसेच मानसिक क्षमता विकसित करावी असे सांगितले.

म.ए.सो. राणी लक्ष्मीबाई मुलींच्या सैनिकी शाळेने सुट्टीच्या या काळात मुलांना केवळ गुंतवून न ठेवता त्यांच्या विकासासाठी खऱ्या अर्थाने उपयोगी ठरेल असे क्रीडा प्रशिक्षण शिबिर आयोजित केले आहे. त्यामध्ये राज्यभरातून प्रशिक्षणार्थी सहभागी झाले आहेत. मानसिक पातळीवर सकारात्मक परिणाम घडवणाऱ्या योग, सूर्यनमस्कार, रोप मल्लखांब यासारख्या क्रीडाप्रकारांबरोबरच अश्वारोहण, रिव्हर क्रॉसिंग यासारख्या साहसी प्रकारांचीही योजना या शिबिरात करण्यात आली आहे. 

कार्यक्रमाचे प्रास्ताविक प्रशांत जोशी यांनी केले. कर्नल सारंग काशीकर (निवृत्त) यांनी पाहुण्यांचा परिचय करून दिला. शाळेच्या प्राचार्या सौ. पूजा जोग यांनी आभार मानले. 

शाळेचे उपमुख्याध्यापक अनंत कुलकर्णी यांनी कार्यक्रमाचे सूत्रसंचालन केले.

राज्याचे शिक्षण आयुक्त म्हणून नियुक्ती झाल्याबद्दल मा. विशाल सोलंकी यांचे महाराष्ट्र एज्युकेशन सोसायटीच्या नियामक मंडळाचे अध्यक्ष मा. राजीवजी सहस्रबुद्धे यांनी आज मा. सोलंकी यांची भेट घेऊन त्यांचे अभिनंदन केले आणि त्यांच्या भावी वाटचालीसाठी शुभेच्छा दिल्या. मा. सोलंकी हे भारतीय प्रशासकीय सेवेतील आसाम केडरचे अधिकारी असून गेली १४ वर्षे ते आसाममध्ये कार्यरत होते. आसाममधील दोन जिल्ह्यांचे जिल्हाधिकारी म्हणून काम पाहिल्यानंतर आसाम सरकारच्या अर्थखात्यात आणि त्यानंतर आसामच्या मुख्य सचिवांच्या कार्यालयात ते कार्यरत होते. आसामच्या मुख्यमंत्र्यांचे सचिव म्हणूनही त्यांनी जबाबदारी सांभाळली आहे. 

सोलंकी यांची नुकतीच महाराष्ट्राचे शिक्षण आयुक्त म्हणून नियुक्ती करण्यात आली असून शिक्षण विभागातील ८ संचलनालयांमध्ये समन्वय साधण्याची महत्त्वपूर्ण कामगिरी त्यांच्याकडे सोपविण्यात आली आहे. 

मा. विशाल सोलंकी हे महाराष्ट्र एज्युकेशन सोसायटीच्या सासवड येथील वाघीरे विद्यालयाचे माजी विद्यार्थी आहेत. त्यामुळे संस्थेतर्फे त्यांचे अभिनंदन करण्यात आले. यावेळी संस्थेचे सचिव डॉ. संतोष देशपांडे, मुख्य कार्यकारी अधिकारी श्री. सचिन आंबर्डेकर, प्रबंधक श्री. नीलकंठ मांडके, शैक्षणिक विकास अधिकारी श्री. अजित बागाईतकर उपस्थित होते.

महाराष्ट्र एज्युकेशन सोसायटीच्या बाल शिक्षण मंदिर, डेक्कन जिमखाना या मराठी माध्यमाच्या शाळेत शाळेचा शेवटचा दिवस अनोख्या पद्धतीने साजरा करण्यात आला. आज दै. महाराष्ट्र टाईम्सच्या पुणे प्लस पुरवणीत पान क्र. २ वर या कार्यक्रमाची बातमी छापून आली आहे.

महाराष्ट्र एज्युकेशन सोसायटीची ‘क्रीडावर्धिनी’ विद्यार्थ्यांची खेळाची आवड वृद्धिंगत व्हावी, त्यांच्यामध्ये क्रीडा संस्कृती रुजावी, खिलाडूवृत्ती निर्माण व्हावी या हेतूने संस्थेच्या सर्व शाखांमध्ये एप्रिल महिन्यात क्रीडा शिबीराचे आयोजन करते. त्यानुसार म.ए.सो.च्या बाल शिक्षण मंदिर, डेक्कन जिमखाना, पुणे ०४ या मराठी माध्यम शाळेतही क्रीडा शिबीर आयोजित करण्यात आले आहे.

शाळेचे महामात्र मा. डॉ. अंकूर पटवर्धन यांच्या हस्ते शुक्रवार, दि. १३/०४/२०१८ या दिवशी शाळेच्या क्रीडा शिबीराचे उद्घाटन करण्यात आले. त्यांनी विद्यार्थ्यांना उत्तम खेळासाठी शुभेच्छा दिल्या. या क्रीडा शिबीरातूनच भावी खेळाडून घडण्यास मदत होईल अशी आशा शाळेच्या मुख्याध्यापिका सौ. प्रतिभा गायकवाड यांनी व्यक्त केली. त्याचप्रमाणे शिशु शाळेच्या मुख्याध्यापिका सौ. रोहिणी फाळके यांनी या प्रसंगी विद्यार्थ्यांना खेळाबरोबरच योग्य आहार कसा असावा याचे मार्गदर्शन केले. कार्यक्रमाचे आयोजन श्री. दत्तात्रय लखे यांनी केले तर सौ. प्रमिला कांबळे यांनी आभार मानले.

विशेष म्हणजे खो-खो या खेळात शिक्षक, शिक्षकेतर कर्मचारी, विद्यार्थी आनंदाने सहभागी झाले होते. त्यांच्या या खेळाद्वारेच क्रीडा शिबिराच्या उद्घाटन कार्यक्रमाची सांगता झाली.

महाराष्ट्र एज्युकेशन सोसायटीच्या मुलांचे विद्यालय व उच्च माध्यमिक विद्यालयातील (पेरुगेट भावेस्कूल) नूतनीकृत संगणक प्रयोगशाळेचे ‘कै. प्रभाकर चानसरकर संगणक प्रयोगशाळा’ असे नामकरण आणि उद्धाटन सोमवार, दि. ९ एप्रिल २०१८ रोजी श्रीमती शिल्पा प्रभाकर चानसरकर यांच्या हस्ते करण्यात आले. या कार्यक्रमाची बुधवार, दि. ११ एप्रिल २०१८ रोजी महाराष्ट्र टाईम्सच्या पुणे प्लस पुरवणीत पान क्र. २ वर प्रसिद्ध झालेली बातमी

संस्थेच्या माहिती तंत्रज्ञान व तंत्रशिक्षण समितीच्या अध्यक्ष आणि संस्थेच्या नियामक मंडळाच्या सदस्य सौ. आनंदी पाटील यांच्या अध्यक्षतेखाली आणि उद्योजक श्री. संग्राम खामकर यांच्या उपस्थितीत हा कार्यक्रम झाला. संस्थेचे सचिव डॉ. संतोष देशपांडे, मुख्य कार्यकारी अधिकारी श्री. सचिन आंबर्डेकर, शाळेचे महामात्र व संस्थेच्या आजीव सदस्य मंडळाचे सदस्य प्रा. सुधीर गाडे, शाळेचे मुख्याध्यापक श्री. रोहिदास भारमळ, तसेच खामकर कुटुंबिय आणि आप्तेष्ट यावेळी उपस्थित होते. 

श्रीमती शिल्पा चानसरकर यांच्या वतीने त्यांच्या भगिनी सौ. अपर्णा विनायक आंबेडकर यांनी मनोगत व्यक्त केले. त्या म्हणाल्या की, “कै. प्रभाकर चानसरकर यांचे व्यक्तिमत्व अतिशय चैतन्यमयी आणि प्रेरणादायी होते. त्यांच्या शैक्षणिक आणि व्यावसायिक प्रगतीचा आलेख कायमच चढता होता. ते सर्वांना कायमच गरजेप्रमाणे मदत करत असत आणि चांगल्या गोष्टींना प्रोत्साहन देत. जगाच्या पाठीवर कुठेही उपचार होणार नाहीत असा डोळ्यांचा विकार झाल्यावरदेखील ते खचले नाहीत, त्यांनी अतिशय खंबीरपणे आपल्या शारिरीक व्याधींना तोंड दिले. कै. प्रभाकर चानसरकर यांचे संगणक या विषयात प्रावीण्य होते. म्हणूनच त्यांच्या स्मरणार्थ शाळेतील संगणक प्रयोगशाळेसाठी देणगी दिली आहे.”

उद्योजक श्री. संग्राम खामकर हे देखील शाळेचे माजी विद्यार्थी आहेत. त्यांनी आपल्या भाषणात शाळेतील आठवणींना उजाळा दिला. ते म्हणाले, “१९८६ साली शाळेतील विद्यार्थ्यांना संगणक दाखवण्यासाठी शैक्षणिक सहल आयोजित करण्यात आली होती. त्यामुळे आपल्याला आयुष्यात पहिल्यांदा संगणक बघण्याची संधी मिळाली आणि आज शाळेतील संगणक प्रयोगशाळेच्या उद्धाटनाला उपस्थित राहण्याची संधी मिळाली, याचा मोठा आनंद होतो आहे. श्रीमती शिल्पा चानसरकर यांनी अतिशय योग्य ठिकाणी देणगी दिली आहे. विद्यार्थ्यांना शालेय जीवनात संगणक शिकायला मिळाल्यामुळे पुढील जीवनात त्यांना त्याचा खूप उपयोग होईल.” 

संस्थेच्या माहिती तंत्रज्ञान व तंत्रशिक्षण समितीच्या अध्यक्ष आणि संस्थेच्या नियामक मंडळाच्या सदस्य सौ. आनंदी पाटील यांनी आपल्या भाषणात महाराष्ट्र एज्युकेशन सोसायटीच्या कार्याचा परिचय करून दिला. त्या म्हणाल्या, “संस्थेने काळाची पावले ओळखून आधुनिकता आणि तंत्रज्ञानाचा स्वीकार केल्यामुळे आजच्या तीव्र स्पर्धेच्या युगात आणि इंग्रजी माध्यमाच्या शाळांच्या आव्हानात भावे स्कूलसारखी शाळा टिकून आहे. अनेक दिग्गज, नामवंत या शाळेचे माजी विद्यार्थी आहेत. शाळेबद्दल वाटणाऱ्या आत्मीयतेतूनच माजी विद्यार्थी शाळेला वेळोवेळी पाठबळ देत असतात. कै. प्रभाकर चानसरकर यांच्या स्मरणार्थ मिळालेली देणगी हे त्याचेच उदाहरण आहे.” 

कार्यक्रमाच्या सुरवातीला आपल्या प्रास्ताविकात श्री. गाडे यांनी, शाळेच्या माजी विद्यार्थ्यांकडून मिळत असलेल्या देणग्यांचा आढावा घेत त्यांच्याबद्दल कृतज्ञता व्यक्त केली. समाजातील दानशूर व्यक्तींच्या पाठबळामुळेच आजच्या आव्हानात्मक परिस्थितीत संस्था मराठी माध्यमाच्या शाळा चालवू शकत असल्याचे सांगितले. 

संस्थेचे मुख्य कार्यकारी अधिकारी श्री. सचिन आंबर्डेकर यांनी कै. प्रभाकर चानसरकर यांच्या कार्याची ओळख करून दिली तसेच प्रमुख पाहुणे व उपस्थित मान्यवरांचा परिचय करून दिला. 

श्री. गाडे यांच्या हस्ते श्रीमती शिल्पा चानसरकर, श्री. खामकर आणि सौ. आनंदी पाटील यांचा सत्कार करण्यात आला. शाळेतील पर्यावेक्षिका सौ. भारती तांबे यांच्या हस्ते चानसरकर कुटुंबियांचा सत्कार करण्यात आला.

कार्यक्रमाच्या शेवटी शाळेचे मुख्याध्यापक श्री. रोहिदास भारमळ यांनी आभार प्रदर्शन केले.

म.ए.सो. क्रीडावर्धिनीने दिनांक २७ ते २९ मार्च २०१८ या कालावधीत संस्थेच्या विविध शाळा / महाविद्यालयातील क्रीडा शिक्षकांचे निवासी क्रीडा मार्गदर्शन शिबीर आयोजित केले होते. म.ए.सो. राणी लक्ष्मीबाई मुलींची सैनिकी शाळा, कासारआंबोली येथे पार पडलेल्या या शिबिरात एकूण ५४ शिक्षकांनी भाग घेतला. त्यात १५ महिला व ३९ पुरुष शिक्षकांचा समावेश होता. शिबिराचे उद्घाटन मंगळवार, दि. २७ मार्च रोजी म.ए.सो.च्या आजीव सदस्य मंडळाचे सदस्य प्रा.सुधीर गाडे यांच्या हस्ते तर आजीव सदस्य मंडळाचे अन्य एक सदस्य प्रा.गोविंद कुलकर्णी यांच्या उपस्थितीत झाले. कार्यक्रमाचे प्रास्ताविक क्रीडावर्धिनीचे समन्वयक प्रा. शैलेश आपटे यांनी केले तर क्रीडावर्धिनीचे महामात्र प्रा. सुधीर भोसले यांनी आभार मानले. 

दि. २८ मार्च रोजी सकाळच्या सत्रात श्री.मनोजकुमार साळी, श्री.राजेंद्र लोखंडे व श्री. दादा शिंदे यांनी सूर्यनमस्कार, योगासनांविषयी मार्गदर्शन केले. 

श्री.शिरीष तिखे यांनी ओंकार व प्राणायाम यांची प्रात्यक्षिकाद्वारे माहिती दिली. 

डॉ. निलेश मसुरकर यांनी अष्टांग योग याविषयी मार्गदर्शन केले.

श्री. मनोजकुमार साळी यांनी आवर्तन ध्यान घेतले.

श्री.मयुरेश डंके यांनी मानसशास्त्रीय तंत्रे याविषयी मार्गदर्शन केले.

भोजनानंतर दुपारच्या सत्रात प्रा. महेश देशपांडे व प्रा.शिरीष मोरे यांनी ‘मास अथलेटिक्स’ या विषयी प्रात्यक्षिकांद्वारे मार्गदर्शन केले.

श्री. जयसिंग जगताप व श्री. दादा शिंदे यांनी सांघिक खेळ घेतले.

सायंकाळच्या सत्रात सैनिकी शाळेचे कमांडट कर्नल सारंग काशीकर (निवृत्त) यांनी प्रात्यक्षिकाद्वारे रायफल शूटिंगबाबत माहिती दिली.

रात्री भोजनानंतरच्या सत्रात नेतृत्वगुण व व्यक्तिमत्व विकास या विषयावर कर्नल काशीकर यांचे व्याख्यान झाले.

दि.२९ रोजी सकाळच्या सत्रात श्री. मनोज साळी यांनी ओंकार, सूर्यनमस्कार व योगासने घेतली. 

आगाशे महाविद्यालयाची विद्यार्थिनी कु. काळे या विद्यार्थिनीने एरोबिक्स या विषयी प्रात्यक्षिकाद्वारे मार्गदर्शन केले.

श्री.सुनील देसाई यांनी मानवी मनोरे (पिरॅमिड) ची माहिती प्रत्यक्षिकांद्वारे दिली.

श्री.दादा शिंदे यांनी हास्य योगाचे प्रशिक्षण दिले. 

महाराष्ट्र एज्युकेशन सोसायटीचे सहाय्यक सचिव डॉ.भरत व्हनकटे यांच्या मार्गदर्शनाने व संस्थेचे मुख्य कार्यकारी अधिकारी श्री.सचिन आंबर्डेकर यांचे उपस्थितीत या शिबिराचा समारोप झाला. यावेळी प्रा. शैलेश आपटे शिबिरातील विविध कार्यक्रमांचा आढावा घेतला. समारोपप्रसंगी प्रा. सुधीर भोसले यांनी आभार प्रदर्शन केले. 

या संपूर्ण शिबिराची धुरा प्रा.शैलेश आपटे, प्रा.सुधीर भोसले व श्री.मनोज साळी यांनी सांभाळली. 

शिबिराच्या यशस्वीतेसाठी सैनिकी शाळेच्या मुख्याध्यापिका व सर्व कर्मचारी वृंदाचे संपूर्ण सहकार्य लाभले.

म ए सो वाघीरे विद्यालयाचा ११२ वा वर्धापन दिन दि. २६ मार्च २०१८ रोजी उत्साहात साजरा करण्यात आला. यावेळी शाळेतील विद्यार्थिनींनी सर्वांना शाळेची माहिती सांगितली. कु. प्रणाली कापरे हीने स्वरचित कविता सादर केली. प्रशालेतील ज्येष्ठ शिक्षिका सौ. कारंडे यांनी विद्यार्थ्यांना शाळेचा इतिहास सांगितला.

आपल्या विद्यालयातील १९५६ सालचे माजी विद्यार्थी आणि सासवड नगरपालिकेचे माजी नगराध्यक्ष श्री. बापूसाहेब नानासाहेब जगताप हे यावेळी प्रमुख पाहुणे म्हणून उपस्थित होते. ते स्वतः प्रगतशील शेतकरी असून बी.ए. एल.एल.बी. पर्यंत त्यांचे उच्च शिक्षण झाले आहे. आपल्या भाषणात श्री. जगताप यांनी शाळेतील आठवणींना उजाळा दिला. शाळेत आमच्यावर उत्तम संस्कार झाले, त्यामुळे आम्ही जीवन यशस्वीरीत्या जगू शकलो असे त्यांनी सांगितले. सासवडच्या कोर्टात काम करत असताना आयुष्यभर सायकलचा वापर केल्यामुळे आज ८५व्या वर्षीही आपण व्यवस्थित आहोत असे त्यांनी विद्यार्थ्यांना सांगतले. नगराध्यक्ष असताना त्यांनी विद्यालयाला पालिकेमार्फत देणगी दिली होती. श्री. जगताप यांचे वडीलही सासवड नगरपालिकेचे नगराध्यक्ष होते. 

यावेळी हिंदी कथाकथन स्पर्धेतील यशस्वी विद्यार्थ्यांना प्रमुख पाहुण्यांच्या हस्ते बक्षीस वितरण करण्यात आले. त्याचे वाचन श्री. आप्पासाहेब कोकरे यांनी केले. 

श्री. सहारे सर यांनी आभार प्रदर्शन केले. कार्यक्रमाचे सूत्रसंचालन श्री. गणेश पाठक यांनी केले. कार्यक्रम यशस्वी होण्यासाठी श्री. एम. के. राऊत व श्री. रा. ब. जगताप यांनी सहकार्य केले.

विद्यार्थ्यांमध्ये ‘दातृत्व’ या गुणाची जोपासना व्हावी या हेतूने आपल्या विद्यालयात एकमुष्टी धान्य योजना राबविण्यात येते. या योजनेत जमा झालेले धान्य तोरणा राजगड परिसर समाजोन्नती न्यास या संस्थेस प्रदान करण्याचा कार्यक्रम शनिवार, दि. १० मार्च २०१८ रोजी आयोजित करण्यात आला होता. या कार्यक्रमाच्या अध्यक्षस्थानी पुण्यातील स्वरुपवर्धिनी या संस्थेचे कार्याध्यक्ष मा. रामभाऊ डिंबळे होते. तोरणा राजगड परिसर समाजोन्नती न्यासाचे सचिव मा. मंदार अत्रे यावेळी प्रमुख पाहुणे म्हणून उपस्थित होते. महाराष्ट्र एज्युकेशन सोसायटीचे मुख्य कार्यकारी अधिकारी मा. सचिन आंबर्डेकर तसेच तोरणा राजगड परिसर समाजोन्नती न्यासातर्फे चालविण्यात येणाऱ्या वसतिगृहाचे व्यवस्थापक मा. रमेश आंबेकर हेदेखील या वेळी उपस्थित होते. 

मा. डिंबळे यांनी आपल्या भाषणात छत्रपती शिवाजी महाराज आणि मावळे यांचा इतिहास विद्यार्थ्यांसमोर मांडत तसेच आपल्या दैनंदिन जीवनातील काही उदाहरणे व अनुभव सांगत दातृत्व गुणाचे महत्व स्पष्ट केले. मा. अत्रे यांनी तोरणा राजगड परिसर समाजोन्नती न्यासाचे विविध उपक्रम आणि योजना यांची माहिती दिली. मा. आंबर्डेकर यांनी एकमुष्टी धान्य गोळा केल्याबद्दल विद्यालयातील विद्यार्थ्यांचे कौतुक केले आणि त्यांना शुभेच्छा दिल्या. 

कार्यक्रमाचे प्रास्ताविक विद्यालयाचे मा. मुख्याध्यापक एस.बी. कुलकर्णी यांनी तर प्रमुख पाहुण्यांचा परिचय ज्येष्ठ शिक्षक रामदासी यांनी करून दिला. विद्यालयातील शिक्षक विनोद पारे यांनी कार्यक्रमाचे सूत्रसंचालन केले. श्री. जगताप सरांनी आभार प्रदर्शन केले. 

आपल्या विद्यालयातील प्रत्येक विद्यार्थी तसेच पदाधिकारी, शिक्षक आणि शिक्षकेतर कर्मचारी या सर्वांनी एकमुष्टी धान्य योजनेअंतर्गत धान्य गोळा केले. संकलित केलेले हे धान्य तोरणा राजगड परिसर समाजोन्नती न्यासातर्फे वेल्हा येथे चालविण्यात येणाऱ्या वसतिगृहाला देण्यात आले.

महाराष्ट्र एज्युकेशन सोसायटीच्या सासवड येथील वाघीरे विद्यालयात ‘जागतिक महिला दिना’निमित्त आज सासवड नगर पालिकेतील महिला स्वच्छता कर्मचाऱ्यांचा सत्कार करण्यात आला. याशिवाय कौटुंबिक परिस्थितीवर मात करून आपल्या मुलांना उच्चशिक्षण देणाऱ्या आपल्या शाळेतील सेविका श्रीमती शारदा सोपान सोळंके यांचा विशेष सत्कार देखील या वेळी करण्यात आला. महिला दिनाचे औचित्य साधत शाळेतील शिक्षिका आणि विद्यार्थिनी प्रतिनिधींचाही सत्कार आज करण्यात आला. यावेळी शाळेतील काही विद्यार्थ्यांनी महिला दिनाची माहिती सांगितली. 

सासवड शहर आणि विशेषतः शाळेच्या आसपासच्या परिसरात स्वच्छता राखण्याचे काम पालिकेच्या सेवेत असलेल्या महिला कर्मचारी करीत असतात. सासवड नगरपालिकेने स्वच्छ भारत अभियानाअंतर्गत स्पर्धा आयोजित केली होती. या स्पर्धेत भाग घेतलेल्या आणि त्यात उत्तम गुण प्राप्त केलेल्या या महिला कर्मचाऱ्यांचा आजच्या कार्यक्रमात सत्कार करून शाळेने त्यांच्याबद्दल कृतज्ञता व्यक्त केली. पुरंदर पंचायत समितीचे विस्तार अधिकारी मा. श्री. पी. एस. मेमाणे यांच्या हस्ते हे सत्कार करण्यात आले. 

आपल्या शाळेतील सेविका श्रीमती शारदा सोपान सोळंके यांचे पती आपल्याच शाळेच्या सेवेत होते. त्यांचे अकस्मात निधन झाल्यानंतर श्रीमती सोळंके या गेली १८ वर्षांपासून शाळेच्या सेवेत आहेत. त्या मूळच्या जळगाव येथील आहेत. पतीच्या निधनावेळी २ आणि ४ वर्षे वय असलेल्या आपल्या मुलांना त्यांनी मोठ्या कष्टाने वाढविले. त्यांना चांगले संस्कार आणि शिक्षण देऊन उच्च शिक्षणासाठी प्रेरित केले. त्यांच्या दोन्ही मुलांनी बी.ई. पर्यंतचे शिक्षण पूर्ण केले आहे. या कर्तृत्ववान मातेचा सत्कार करून आपल्यातीलच एका आदर्श महिलेचा परिचय शाळेने या निमित्ताने सर्वांना करून दिला. 

या कार्यक्रमाला पालक-शिक्षक संघाच्या उपाध्यक्षा सौ. मनिषा बडधे उपस्थित होत्या. 

कार्यक्रमाचे सूत्रसंचालन शाळेतील शिक्षक गणेश पाठक यांनी केले. 

शाळेचे मुख्याध्यापक श्री. एस.बी. कुलकर्णी यांच्या प्रेरणेतून आयोजित करण्यात आलेला हा कार्यक्रम यशस्वी करण्यासाठी एन. के. राऊत, हि.बा. सहारे तसेच नगरसेवक आणि शाळेचे माजी विद्यार्थी श्री. अजित जगताप यांनी सहकार्य केले

म.ए.सो. बालशिक्षण मंदिर इंग्लिश मिडीयम शाळेत नेहमीच अभिनव उपक्रम केले जातात. शिवजयंतीचे औचित्य साधून गेली ३ वर्षे शाळेत ‘स्पोर्ट्स एथलेटिक्स मीट’ आयोजित केली जाते. यावर्षी या स्पर्धेत पुणे शहरातील २३ नामवंत शाळा आणि विविध स्पोर्ट्स क्लबचे २८० स्पर्धक सहभागी झाले होते. उद्घाटन सोहळ्यास प्रमुख अतिथी म्हणून एथलेटिक्स तज्ञ हर्षल निकम, ‘मएसो’चे सहसचिव व शाळेचे महामात्र डॉ. भरत व्हनकटे, क्रीडावर्धिनीचे महामात्र प्रा. सुधीर भोसले, क्रीडावर्धिनीचे समन्वयक प्रा. शैलेश आपटे, शाळेच्या मुख्याध्यापिका सौ. गीतांजली बोधनकर उपस्थित होते. स्पर्धेच्या बक्षीस समारंभास सुनील शिवले प्रमुख पाहुणे म्हणून लाभले. त्यांच्या हस्ते पुरस्कारांचे वितरण करण्यात आले. यावेळी महाराष्ट्रातील लोककलांच्या माध्यमातून साहसी खेळ सादर करण्यात आले. १०,१२,१४ वर्षाखालील खेळाडूंच्या सांघिक, वैयक्तिक स्पर्धा झाल्या. गोळाफेक, लांब उडी, धावणे इ. स्पर्धा झाल्या. विद्यार्थ्यांचा उत्साह,चुरस पहाण्यासारखी होती. आनंद णि उत्साहाच्या वातावरणात या स्पर्धा पार पडल्या. सर्वसाधारण गटात मुले विभागाचे विजेतेपद डॉ. कलमाडी शामराव विद्यालयाला तर मुलींच्या विभागाचे विजेतेपद म.ए.सो.बाल शिक्षण मंदिर इंग्लिश मिडियम शाळेला मिळाले. सर्वोत्तम विजेतेपददेखील म.ए.सो.बाल शिक्षण मंदिर इंग्लिश मीडियम शाळेला मिळाले. साहसी खेळ व व्यायाम हे शिवाजी महाराजांच्या शौर्यगाथेचा अविभाज्य भाग आहे. आजच्या ‘व्हर्चुअल गेम’च्या जमान्यात मुले मैदानी खेळ खेळत नाहीत ही ज्वलंत समस्या आहे. त्यावर ‘स्पोर्ट्स एथलेटिक मीट’ हा एक खूप प्रभावी उपाय असून तो उपयुक्त आणि प्रोत्साहन देणारा ठरत आहे, असे इतर शाळांच्या क्रीडा शिक्षकांनी सांगितले.

महाराष्ट्र एज्युकेशन सोसायटीच्या नवीन पनवेलमधील आद्यक्रांतिवीर वासुदेव बळवंत फडके विद्यालयाच्या प्रांगणातील नूतनीकृत डॉ. प्रभाकर पटवर्धन सभागृहाचे उद्घाटन संस्थेचे अध्यक्ष एअर मार्शल भूषण गोखले (निवृत्त) यांच्या हस्ते गुरुवार दि. ०१ फेब्रुवारी २०१८ रोजी झाले. 

यावेळी संस्थेचे उपाध्यक्ष मा. डॉ. यशवंत वाघमारे, संस्थेच्या नियामक मंडळाचे अध्यक्ष श्री. राजीव सहस्रबुद्धे, संस्थेचे सचिव डॉ.संतोष देशपांडे, पनवेलमधील ज्येष्ठ सामाजिक कार्यकर्त्या मा. नीलाताई पटवर्धन, शाला समितीचे अध्यक्ष अॅड.जयंत म्हाळगी, शाळेचे महामात्र डॉ.अतुल कुलकर्णी आदी मान्यवर उपस्थित होते.

मा. नीलाताई पटवर्धन यांनी दिलेल्या भरघोस देणगीतून नूतनीकरण करण्यात आलेल्या या सभागृहाची आसन क्षमता ३०० असून दोन ग्रीन रूम, मध्यवर्ती वातानुकूलन यंत्रणा, अद्ययावत ध्वनिक्षेपण यंत्रणा यांनी हे सभागृह सुसज्ज आहे. 

उद्घाटनाच्या कार्यक्रमाची सुरुवात नटराज पूजन, सरस्वतीपूजन व संस्थेच्या संस्थापकांच्या प्रतिमा पूजनाने झाली. नियामक मंडळाचे अध्यक्ष मा. राजीव सहस्रबुद्धे यांनी आपल्या प्रास्ताविकात संस्थेच्या कार्याचा आढावा घेतला. त्यानंतर विद्यालयाचे महामात्र डॉ. अतुल कुलकर्णी यांनी व्यासपीठावरील मान्यवरांचा परिचय करून दिला. 

मा. नीलाताई पटवर्धन मनोगतात म्हणाल्या, “आम्ही कुटुंबीय म.ए.सो.चे माजी विद्यार्थी असल्यामुळे संस्थेच्या कामाचे कौतुक आहे, संस्थेची ध्येय-उद्दिष्ट्ये आमच्या विचारांशी सुसंगत असल्याने शाळेला देणगी दिली आहे. आपल्या अध्यक्षीय भाषणात मा. भूषणजी गोखले यांनी नूतनीकरण केलेल्या डॉ. पटवर्धन सभागृहाची कल्पना मांडणाऱ्या व साकारणाऱ्या सर्वांचे मनापासून कौतुक केले. नाटक, संगीत अशा कला तसेच खेळांमुळे व्यक्तिमत्वाचा सर्वांगीण विकास होतो, त्या दृष्टीने या सभागृहाचा फायदा शाळेतील विद्यार्थ्यांना होणार आहे. तसेच नवीन पनवेल परिसरातील हे सभागृह छोटेखानी सांस्कृतिक, सामाजिक, शैक्षणिक कार्यक्रमासाठी वरदानच ठरेल असे त्यांनी नमूद केले.

यावेळी शाळेच्या ‘संवाद’ या पाक्षिकाचे प्रकाशन मा. भूषणजी गोखले यांचे हस्ते झाले. कु.वैष्णवी कदम हिने या पाक्षिकाचे संपादन केले आहे. 

शाला समितीचे अध्यक्ष अॅड. जयंत म्हाळगी यांनी आभार व्यक्त केले. कार्यक्रमाचे सूत्रसंचालन सहाय्यक शिक्षिका स्वप्ना अत्रे यांनी केले.

औपचारिक उद्घाटन सोहळ्यानंतर किराणा घराण्याची विख्यात गायिका आरती ठाकूर-कुंडलकर यांच्या शास्त्रीय, उपशास्त्रीय संगीत व अभंग गायनाचा ‘सूरसंगत’ हा कार्यक्रम झाला. आपल्या बहारदार गायनाने त्यांनी उपस्थितांची मने जिंकली.

सगळ्याच शाळांमध्ये बाहुलीचे लग्न करण्यात येते. परंतु, आपल्या शाळेमध्ये “विद्या आणि विनय” या बहुला-बाहुलीचे लग्न खऱ्या लग्न सोहळ्यासारखे करण्यात आले. हा सोहळा दि. ११ जानेवारी २०१८ रोजी शाळेमध्ये पार पडला. त्यामध्ये परिसरातील इतर शाळांनाही आमंत्रित करण्यात आले होते. या सोहळ्यामध्ये शैक्षणिक मंगलाष्टका म्हणण्यात आल्या. प्रथेप्रमाणे रुखवत देखील सजवला गेला होता. वरदाव्यामध्ये मनसोक्त नाचण्याचा आनंद बालचमूंनी घेतला. पालकांनी आणि आलेल्या पाहुणे मंडळींनी शाळेस शैक्षणिक व शालोपयोगी वस्तूंचा आहेर दिला. या लग्नासोहळ्याची सांगता रीतसर जेवणाच्या पंगतींनी झाली.

आपल्या प्रशालेतील १९७७-७८ बॅचच्या माजी विद्यार्थ्यांतर्फे मंगळवार, दि. ३१ ऑक्टोबर २०१७ रोजी प्रशालेला वर्गातील फलक देण्यात आले. शाळेतील विद्यार्थ्यांच्या गरजा लक्षात घेऊन शाळेस मदत करण्यासाठी शाळेचा माजी विद्यार्थी संघ नेहमीच तत्पर असतो. ज्या शाळेने आपल्याला शिकवले, घडवले, शाळेच्या बाहेरील जगात वावरण्यासाठी तयार केले, त्या शाळेच्या ऋणात राहूनच दातृत्वाचा आदर्श पुढील पिढीसमोर ठेवण्यासाठी माजी विद्यार्थी प्रतिनिधी श्री. राजेंद्र मराठे यांनी शाळेतील प्रत्येक वर्गासाठी हे फलक प्रदान केले. या फलक अर्पण सोहळ्याचे आणि शाला समिती अध्यक्ष श्री. भालचंद्र पुरंदरे यांनी प्रशालेच्या माजी विद्यार्थ्यांची आदर्श व अभिमानास्पद परंपरा सांगून कृतज्ञता व्यक्त केली. मुख्याध्यापक श्री. भारमळ यांनी कार्यक्रमाचे नियोजन केले. कार्यक्रमास उपमुख्याध्यापिका सौ. कांता ईष्टे, पर्यवेक्षिका सौ. भारती तांबे तसेच सकाळ आणि दुपार विभागाचे शिक्षक व प्राध्यापक वर्ग उपस्थित होता. अनेक माजी विद्यार्थी यावेळी आवर्जून उपस्थित होते. कार्यक्रमाचे सूत्रसंचालन व आभार प्रदर्शन सौ. योगिता चौकटे यांनी केले.

केंद्र सरकारच्या वैज्ञानिक आणि औद्योगिक संशोधन परिषदेतर्फे (CSIR) देण्यात येणारा ‘शालेय विद्यार्थ्यांसाठीचा सीएसआयआर संशोधन पुरस्कार’ आपल्या शाळेतील विद्यार्थिनी कु. तन्मयी अप्पासाहेब कोकरे (इ. 5 वी) आणि कु. तनिष्का अप्पासाहेब कोकरे (इ.7 वी) या दोघींना मंगळवार, दि. 26 सप्टेंबर 2017 रोजी देशाचे मा. राष्ट्रपती रामनाथ कोविंद यांच्या हस्ते प्रदान करण्यात आला. त्याची वृत्तपत्रांमध्ये प्रसिद्ध झालेली बातमी.

सासवडमधील म.ए.सो. वाघीरे हायस्कूल या शाळेच्या ‘दुस-या मजल्याच्या पूर्ण झालेल्या बांधकामाचा उद्घाटन समारंभ’ आणि येथील तंत्रशिक्षण विभागाचे ‘स्व. डॉ. सीता कुलकर्णी तंत्र-शिक्षण विभाग’ असे नामकरण हे दोन्ही कार्यक्रम मंगळवार, दिनांक २२ ऑगस्ट २०१७ रोजी अतिशय उत्साह आणि आनंदाच्या वातावरणात पार पडले. 

महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त), स्व. डॉ. सीता कुलकर्णी यांचे चिरंजीव डॉ. श्यामकांत कुलकर्णी, संस्थेच्या नियामक मंडळाचे अध्यक्ष मा. राजीव सहस्रबुद्धे, संस्थेचे सचिव डॉ. संतोष देशपांडे, वाघीरे हायस्कूलच्या शाला समितीचे अध्यक्ष मा. देवदत्त भिशीकर, शाळेचे मुख्याध्यापक श्री. एस.बी. कुलकर्णी यावेळी व्यासपीठावर उपस्थित होते. 

कार्यक्रमाचे प्रास्ताविक शाला समितीचे अध्यक्ष मा. देवदत्त भिशीकर यांनी केले. ते म्हणाले, “महाराष्ट्र एज्युकेशन सोसायटी ही अग्रगण्य शिक्षण संस्था असून गेल्या 157 वर्षात संस्थेने असंख्य सुसंस्कृत आणि जबाबदार नागरीक घडविले आहेत. आज शिक्षणाचे बाजारीकरण झालेले असतानाही संस्थेचे हे ध्येय कायम आहे. ग्रामीण भागात चांगले आणि स्वस्त दरात शिक्षण उपलब्ध करून देण्यासाठी संस्थेने सासवडमध्ये शाळा सुरु केली. शिक्षणासाठी पोषक वातावरण निर्माण होण्यासाठी मूलभूत सुविधा आवश्यक असतात. ‘मएसो’च्या सर्वच शाखांमध्ये अशा सुविधा उपलब्ध आहेत. सासवडमधील शाळेच्या प्रांगणात संस्थेने दुसऱ्या मजल्याचे वाढीव बांधकाम पूर्ण करून 7 वर्गखोल्यांची भर घातली आहे. त्यामुळे जागेची अडचण दूर होत आहे. संस्थेने सासवडच्या शाळेतील पायाभूत सुविधांच्या विकासावर लक्ष केंद्रीत केले आहे.”

डॉ. श्यामकांत कुलकर्णी हे शाळेचे माजी विद्यार्थी असून त्यांनी आपल्या मातोश्री स्व. डॉ. सीता कुलकर्णी यांच्या स्मृतिप्रित्यर्थ शाळेला देणगी दिली आहे. त्यामुळे शाळेच्या तंत्रशिक्षण विभागाचे ‘स्व. डॉ. सीता कुलकर्णी तंत्र-शिक्षण विभाग’ असे नामकरण करण्यात आले. विशेष म्हणजे हे दोघेही जण मएसो वाघीरे विद्यालयाचे माजी विद्यार्थी असून आई आणि मुलाने एकाच वेळी म्हणजे सन 1953 मध्ये मॅट्रीकच्या परीक्षेत यश मिळविले होते. या परीक्षेत श्यामकांत कुलकर्णी यांनी शाळेत पहिल्या क्रमांक पटकाविला होता. 

आपल्या आठवणींना उजाळा देताना डॉ. श्यामकांत कुलकर्णी म्हणाले की, “माझ्या आईला शिक्षणाची आवड होती. ती याच शाळेत हिंदी विषयाची शिक्षिका होती. तिने आम्हा मुलांना केवळ अभ्यास करायला शिकवले नाही तर लिहीयाचे कसे हे देखील शिकवले. एवढेच नाही तर अगदी रागवायचे कसे आणि भांडायचे कसे हे देखील शिकविले. ती अतिशय स्वाभिमानी होती. शाळा-महाविद्यालयातील अभ्यासक्रम संपला तरी आयुष्यभर शिक्षण चालूच असते. त्यामुळे भेटणारी प्रत्येक व्यक्ती ही जीवन-शिक्षणात गुरुच असते.”

स्व. डॉ. सीता कुलकर्णी यांचे जुने सहकारी श्री. रामकृष्ण कदम यांनी देखील आपल्या आठवणी यावेळी सांगितल्या. “पुण्यातील एका शाळेत शिक्षिका म्हणून कार्यरत असताना शाळेच्या मुख्याध्यापकांनी सीता कुलकर्णी यांना एम.ए.चा अभ्यास करण्यास मज्जाव केला आणि एम.ए. करावयाचे असेल तर राजीनामा देण्यास सांगितले. सीता कुलकर्णी यांनी दोन मिनिटांमध्ये आपला राजीनामा लिहून मुख्याध्यापकांकडे सुपूर्द केला. त्यांचा तो स्वाभिमानी बाणा बघून मी अचंबित झालो. त्या क्षणापासून म्हणजे 1962 पासून त्यांचा आदर्श माझ्यासमोर आहे. सीता कुलकर्णी यांच्याकडून मी कायमच शिकत आलो आहे, म्हणूनच आज 80 व्या वर्षीदेखील मी पी.एचडी. चा अभ्यास करीत आहे.”

संस्थेचे अध्यक्ष एअर मार्शल भूषण गोखले (निवृत्त) आपल्या अध्यक्षीय भाषणात म्हणाले की, “शिक्षण कधीच संपत नाही असे मानणारे विद्यार्थी हाच महाराष्ट्र एज्युकेशन सोसायटीचा वारसा आहे. अनेक आव्हानांना तोंड देत शिक्षण घेतलेल्या एका महिलेच्या स्मरणार्थ शाळेला मिळालेल्या देणगीमुळे भविष्यात येणाऱ्या सर्व आव्हानांना तोंड देत पुढे जाण्याची प्रेरणा मिळाली आहे. ‘मएसो’च्या शाखांमध्ये केवळ शिक्षण दिले जात नाही तर तिथे संस्कारही केले जातात. त्यामुळे वाघीरे शाळेतील शिक्षकवर्गावर मोठी जबाबदारी आहे. बदलत्या सामाजिक परिस्थितीत विद्यार्थ्यांवर केवळ लक्ष ठेवून चालणार नाही तर त्यांना जाणून घेणेदेखील खूपच आवश्यक झाले आहे.” डॉ. श्यामकांत कुलकर्णी यांनी केलेल्या सूचनांचे संस्था तंतोतंत पालन करेल अशी ग्वाहीदेखील त्यांनी या वेळी दिली. 

संस्थेच्या नियामक मंडळाचे सदस्य, आजीव सदस्य मंडळाचे सदस्य, संस्थेचे मुख्य कार्यकारी अधिकारी, डॉ. कुलकर्णी यांचे नातेवाईक, तसेच शिक्षक व अन्य कर्मचारी यावेळी उपस्थित होते. 

शाळेचे मुख्याध्यापक श्री. एस.बी. कुलकर्णी यांनी आभार प्रदर्शन केले तर कार्यक्रमाचे सूत्रसंचालन शाळेतील शिक्षिका सौ. संगीता रिकामे यांनी केले.

पुणे जिल्हा परिषदेचे माध्यमिक विभागाचे नवीन शिक्षणाधिकारी मा. श्री. मोरे यांनी आज मएसो मुलांचे विद्यालयाला भेट दिली. यावेळी महाराष्ट्र एज्युकेशन सोसायटीचे मुख्य कार्यकारी अधिकारी श्री. सचिन आंबर्डेकर यांनी त्यांचे स्वागत केले. याप्रसंगी (डावीकडून) मएसो कार्यालयातील मुख्य लिपिक श्री. विनायक लिमये, प्रबंधक श्री. नीलकंठ मांडके, उपशिक्षण अधिकारी सौ. संध्या गायकवाड, श्री. आंबर्डेकर, शाळेचे मुख्याध्यापक श्री. आर.डी. भारमळ आणि शाळेच्या पर्यवेक्षिका सौ. भारती तांबे उपस्थित होते.

म.ए.सो. ‘गरवारे कॉलेज ऑफ कॉमर्स’ला ५० वर्षे पूर्ण झाल्यानिमित्त ‘सुवर्ण आठवणींचा गोफ’ या छायाचित्र प्रदर्शनाचे आयोजन केले होते. सन १९६७ ते सन २०१७ हा एक कालपटच महाविद्यालयाने यानिमित्ताने उभा केला होता. नियतकालिके व छायाचित्रे यांच्यासमवेत माजी विद्यार्थी तसेच माजी शिक्षकांना जुन्या आठवणींत रमण्याची ही एक नामी संधी महाविद्यालयाने दिली होती.
प्रदर्शनाच्या उद्घाटनप्रसंगी महाविद्यालयाचे सल्लागार समितीचे अध्यक्ष C.A. अभय क्षीरसागर, प्राचार्य डॉ. एन. एस. उमराणी, संस्थेचे माजी सचिव र.वि. कुलकर्णी, संस्थेचे अन्य पदाधिकारी व संस्थेचे मुख्य कार्यकारी अधिकारी सचिन आंबर्डेकर उपस्थित होते. महाविद्यालयाच्या माजी विद्यार्थी व शिक्षकांच्या उपस्थितीत सुवर्णमहोत्सवचा हा ऐतिहासिक सोहळा उत्साहात पार पडला.

पुणे – अत्याधुनिक शस्त्रास्त्रे, देशभरातील संशोधन संस्थांच्या कार्यासह देशातील पारंपरिक ज्ञानाची ओळख करून देणाऱ्या भारतीय विज्ञान संमेलनातील प्रदर्शनाचे उदघाटन केंद्रीय रेल्वेमंत्री सुरेश प्रभू यांनी व्हिडीओ संदेशाद्वारे गुरुवारी (ता. ११) केले. ‘देशभरातील संशोधन संस्थांनी केलेले संशोधन कार्य तरुण पिढीसाठी प्रेरणादायी असून, विज्ञान भारतीच्या विज्ञान संमेलनाच्या माध्यमातून हे कार्य देशभर पोहोचत आहे. भारताला पारंपरिक ज्ञानाचा मोठा वारसा लाभलेला असून, आधुनिक विज्ञान आणि पारंपरिक ज्ञानाच्या संगमातून संशोधनाच्या नव्या संधी निर्माण होतील,’ असे विचार सुरेश प्रभू यांनी व्हिडीओ संदेशातून मांडले. एक्स्पोच्या उदघाटनाला विज्ञान भारतीचे राष्ट्रीय अध्यक्ष डॉ. विजय भटकर, महासचिव ए. जयकुमार, संघटनमंत्री जयंत सहस्रबुद्धे, डेक्कन एज्युकेशन सोसायटीचे अध्यक्ष डॉ. शरद कुंटे, नॅशनल सेंटर फॉर सेल सायन्सेसचे संचालक डॉ. शेखर मांडे, डीआरडीओच्या एसीई विभागाचे महासंचालक डॉ. पी. के मेहता, संमेलनाचे संयोजक मुकुंद देशपांडे आदी उपस्थित होते. महाराष्ट्र एज्युकेशन सोसायटी या संमेलन आणि प्रदर्शनाची सहप्रायोजक आहे. ब्राह्मोस क्षेपणास्त्र, पिनाका मल्टी बॅरल रॉकेट लॉन्चर, भारत ५२ हॉवित्झर तोफ यांसह डिफेन्स रिसर्च अँड डेव्हलपमेंट ऑर्गनायझेशनने (डीआरडीओ) विकसित केलेले अत्याधुनिक तंत्रज्ञान, तसेच भारतातील पारंपरिक व्यवसायांमध्ये वापरण्यात येणाऱ्या तंत्रज्ञानाचे प्रत्यक्ष सादरीकरण हे एक्स्पोचे मुख्य आकर्षण आहे. केंद्रीय विज्ञान- तंत्रज्ञान मंत्रालय, भूविज्ञान मंत्रालय, कौन्सिल फॉर सायन्टिफिक अँड इंडस्ट्रियल रिसर्च (सीएसआयआर) या विभागांच्या अंतर्गत येणाऱ्या संशोधन संस्थांचा सायन्स एक्स्पोमध्ये सहभाग आहे. सायन्स एक्स्पो येत्या रविवारपर्यंत सकाळी अकरा ते रात्री आठपर्यंत सर्वांना पाहण्यासाठी खुले राहणार आहे. पाचव्या भारतीय विज्ञान संमेलनाचे उदघाटन शुक्रवारी (ता. १२) सकाळी दहा वाजता केंद्रीय माहिती आणि प्रसारण राज्यमंत्री राज्यवर्धन सिंग राठोड, राज्याचे शिक्षणमंत्री विनोद तावडे यांच्या उपस्थितीत होणार आहे. यावेळी ज्येष्ठ शास्त्रज्ञ प्रा. एम. एम. शर्मा यांचे बीजभाषण होईल. संमेलनामध्ये देशभरातून आलेले संशोधक इंग्रजीप्रमाणेच भारतीय भाषांमधून आपले संशोधन सादर करणार आहेत. विज्ञान प्रदर्शनात सहभागी झालेल्या संस्थांचे दालनांना नागरिक आवर्जून भेट देत आहेत महाराष्ट्र एज्युकेशन सोसायटीचीदेखील या संमेलनात B10 आणि B11 अशी दोन दालने आहेत. आज पहिल्याच दिवशी राष्ट्रीय स्वयंसेवक संघाचे अखिल भारतीय बौद्धिक प्रमुख मा. स्वांतरंजन, केंद्रीय कार्यकारिणीचे सदस्य मा. मधुभाई कुलकर्णी, संघाचे पुणे महानगराचे मा. संघचालक रवींद्र वंजारवाडकर यांनी मएसोच्या दालनांना भेट दिली.

महाराष्ट्र एज्युकेशन सोसायटी, पुणे च्या नवीन पनवेल येथील आद्यक्रांतिवीर वासुदेव बळवंत फडके विद्यालयाकरिता श्रीनिधी संकलनासाठी आयोजित करण्यात आलेल्या “मिले सुर मेरा तुम्हारा” या सुरेल कार्यक्रमात शाळेला सढळ हस्ते मदत करणा-या उद्योजक व प्रायोजकांचे आभार मानण्यात आले. या कार्यक्रमाला ‘मएसो’च्या नियामक मंडळाचे अध्यक्ष मा. राजीव सहस्त्रबुद्धे, संस्थेचे चिटणीस मा. डॉ. संतोष देशपांडे, विद्यालयाच्या शाला समितीचे अध्यक्ष ॲड. जयंत म्हाळगी, विद्यालयाचे महामात्र डॉ. आनंद लेले, मुख्याध्यापिका सौ. मानसी वैशंपायन, प्राथमिक विभाग मराठी माध्यमाच्या मुख्याध्यापिका मा. निशा देवरे, पर्यवेक्षिका सौ. सोमण (मराठी माध्यम), सौ. सुषमा सप्रे (इंग्रजी माध्यमिक), सौ. तन्वी परुळेकर (इंग्रजी प्राथमिक) आदी मान्यवर उपस्थित होते. या प्रसंगी पनवेलमधील प्रसिद्ध सिनेनाट्य निर्मात्या मा. कल्पना कोठारी, इतिहास अभ्यासक मा. विश्वनाथ गोखले, योगाचार्य मा.पु. ल. भारद्वाज व जेष्ठ समाजसेविका मा. नीलाताई पटवर्धन यांना सन्मानपत्र देऊन सन्मानित करण्यात आले. पनवेलचे आमदार मा. प्रशांत ठाकूर यांनाही यावेळी गौरविण्यात आले. हा कार्यक्रम पनवेलच्या फडके नाट्यगृहात पार पडला. यात सुवर्णा माटेगावकर, वैभव वशिष्ठ, सोनाली कर्णिक, संदीप शाह, निलेश निरगुडकर यांनी हिंदी गाणी सादर करुन रसिकांची वाहवा मिळवली. निवेदन संदीप कोकिळ यांनी केले. कार्यक्रमाच्या शेवटी विद्यालयातील विद्यार्थिनींनी “मिले सूर मेरा तुम्हारा” या गीतावर नृत्य सादरीकरणही केले. अतिशय रंगलेल्या या कार्यक्रमाला रसिकांनीही उत्तम प्रतिसाद दिला.

(छायाचित्रात डावीकडून) – राज्याच्या आदिवासी विकास विभागाच्या सचिव मनिषा वर्मा, नाशिकच्या महापौर रंजनाताई भानसी, राज्याचे ग्रामविकास राज्यमंत्री दादाजी भुसे, राज्याचे आदिवासी विकास मंत्री विष्णु सवरा, राणी लक्ष्मीबाई मुलींची सैनिकी शाळेचे उप-प्राचार्य अनंत कुलकर्णी, प्राचार्या पूजा जोग आणि शाळेच्या महामात्रा सौ. चित्रा नगरकर.

महाराष्ट्र शासनाच्या वतीने देण्यात येणारा ‘आदिवासी सेवा संस्था’ पुरस्कार महाराष्ट्र एज्युकेशन सोसायटीच्या राणी लक्ष्मीबाई मुलींची सैनिकी शाळेला मिळाला आहे. रु. 50,001/- चा धनादेश, प्रमाणपत्र, शाल आणि श्रीफळ असे या पुरस्काराचे स्वरुप आहे. आदिवासी समाजासाठी केलेल्या उल्लेखनीय कार्याच्या सन्मानार्थ सन 2015-16 आणि सन 2016-17 या वर्षांसाठी शाळेला हा पुरस्कार देण्यात आला आहे.
नाशिक येथील कालिदास कलामंदिरात सोमवार, दि.27 मार्च 2017 रोजी राज्याचे आदिवासी विकास मंत्री मा. श्री. विष्णु सवरा यांच्या हस्ते हा पुरस्कार शाळेला प्रदान करण्यात आला. शाळेच्या वतीने शाळेच्या महामात्रा सौ. चित्रा नगरकर, प्राचार्या पूजा जोग आणि उप-प्राचार्य श्री.अनंत कुलकर्णी यांनी हा पुरस्कार स्विकारला.
या पुरस्कार वितरण कार्यक्रमाच्या अध्यक्षस्थानी राज्याचे आदिवासी विकास मंत्री मा. श्री.विष्णु सवरा हे होते. राज्याचे ग्रामविकास राज्यमंत्री मा. श्री.दादाजी भुसे, आदिवासी विकास विभागाच्या सचिव मा. मनिषा वर्मा तसेच नाशिकच्या महापौर मा. रंजनाताई भानसी आदी मान्यवर उपस्थित होते.
महाराष्ट्रातील 16 व्यक्ती आणि 7 संस्थाना ‘आदिवासी सेवक’ आणि ‘आदिवासी सेवा संस्था’ या पुरस्काराने गौरविण्यात आले.

पुणे, दि. २६ – महाराष्ट्र एज्युकेशन सोसायटीच्या आबासाहेब गरवारे महाविद्यालयाच्या जैवविविधता विभागाच्या विकास आणि विस्तारासाठी कोलकाता येथील उद्योजक कै. अण्णासाहेब कुलकर्णी यांच्या स्मरणार्थ कुलकर्णी परिवाराने भरघोस अर्थसहाय्य केले आहे. त्यामुळे या विभागाचे ‘अण्णासाहेब कुलकर्णी (कोलकाता) जैवविविधता विभाग’ असे नामकरण करण्यात येणार आहे. तसेच कै. अण्णासाहेब कुलकर्णी यांचे ज्येष्ठ चिरंजीव डॉ. सतीश कुलकर्णी महाविद्यालयाच्या जैवविविधता विभागाचे मानद वैज्ञानिक सल्लागार म्हणून काम करणार आहेत. ‘यमाई फॅशन्स प्रायव्हेट लिमिटेड’ आणि ‘ट्रायोट्रेंड एक्स्पोर्टस् प्रायव्हेट लिमिटेड’ या दोन कंपन्यांनी सामाजिक जबाबदारीच्या भूमिकेतून हा निधी दिला आहे. उद्योगांनी अशाप्रकारे घेतलेल्या पुढाकारामुळे विद्यार्थ्यांना विविधांगी संशोधन करता येणार असून संशोधनाच्या कार्याला चालना मिळणार आहे. आज सकाळी, रविवार, दि.२६ मार्च रोजी संस्थेच्या गुरुवर्य डॉ. प्र.ल. गावडे सभागृहात झालेल्या कार्यक्रमात महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त) यांनी डॉ. सतीश कुलकर्णी आणि श्री. मुकुंद कुलकर्णी यांच्याकडून या निधीचा धनादेश स्वीकारला. या प्रसंगी संस्थेचे उपाध्यक्ष डॉ. यशवंत वाघमारे, संस्थेच्या नियामक मंडळाचे अध्यक्ष राजीव सहस्रबुद्धे, संस्थेचे सचिव डॉ. संतोष देशपांडे, नियामक मंडळाचे सदस्य डॉ. माधव भट तसेच कुलकर्णी परिवारातील सदस्य, आप्त-स्नेही, डॉ. मदन फडणीस आदी मान्यवर उपस्थित होते. पाणी, पर्यावरण, हवामान बदल, देशीज वनस्पती आणि प्राणी यांचे अस्तित्व टिकवून ठेवणे, विकास कामांमुळे निर्माण होणाऱ्या समस्या आणि पश्चिम घाटाचे मूळ स्वरूप अबाधित राखण्यासमोरील आव्हाने यासंदर्भात मएसो आबासाहेब गरवारे महाविद्यालयाच्या जैवविविधता विभागाची ध्येय, उद्दीष्टे आणि प्रत्यक्ष काम अत्यंत सुसंगत आहेत. त्यामुळेच या विभागाला हे अर्थसहाय्य देण्यात आले आहे. डॉ. सतीश कुलकर्णी हे उच्च विद्याविभूषित असून त्यांनी अमेरिकेतील व्हर्जिनिया टेक विद्यापीठातून पी.एच.डी. प्राप्त केली आहे. कॅलिफोर्निया येथील लॉरेन्स लिव्हरमोर लॅबोरेटरीच्या न्यूक्लिअर टेस्ट इंजिनिअरींग विभागाचे प्रमुख म्हणून २८ वर्षे, नवी दिल्लीतील अमेरिकी दूतावासात विज्ञान, तंत्रज्ञान, पर्यावरण आणि आरोग्य विषयक काऊन्सिलर म्हणून ३ वर्षे ते कार्यरत होते. निवृत्तीनंतर निरपेक्ष वृत्तीने विविध संस्थासाठी ते सल्लागार म्हणून कार्यरत आहेत. श्री. मुकुंद कुलकर्णी यांनी खरगपूर येथील आय.आय.टी. मधून केमिकल इंजिनीअरींगमध्ये बी. टेक. केल्यानंतर कै. अण्णासाहेब कुलकर्णी यांनी स्थापन केलेल्या कातडी वस्तूंची निर्मिती आणि निर्यातीच्या व्यवसायात कार्यरत झाले. युरोप आणि अमेरिकेतील रॅडली, पिकागो यासारख्या जगप्रसिद्ध फॅशन ब्रँडबरोबर त्यांचा व्यावसायिक संबंध आहे. कै. अण्णासाहेब कुलकर्णी हे कातडी वस्तूंच्या निर्यात व्यवसायाचे जनक मानले जातात. या क्षेत्रात त्यांच्या उद्योगाचे नाव अग्रेसर आहे.