“विद्यार्थीदशेतील जीवन हा आयुष्यातील सोनेरी काळ असतो. अभ्यासक्रमाला अनुसरून विद्यार्थी ज्या गोष्टी आत्मसात करतो, त्यातून त्याला जीवनभर पुरेल असे शिक्षण मिळते. त्यामुळे शिकण्यासाठी इच्छाशक्ती आवश्यक असते. कोणतेही शॉर्टकट मारण्याचा प्रयत्न करणे उपयोगी ठरत नाही. कष्टांना पर्याय नसतो, त्यामुळे मनापासून कष्ट केले पाहिजेत. आपला दृष्टिकोन केंद्रीत (Focused Approach) असला की कोणताही विषय आत्मसात करणे सोपे जाते,” अशा शद्बात राज्याचे तंत्रशिक्षण संचालक डॉ. विनोद मोहितकर यांनी ‘मएसो’च्या गुणवंत विद्यार्थ्यांना मार्गदर्शन केले.
शैक्षणिक वर्ष २०२३-२४ मध्ये महाराष्ट्र एज्युकेशन सोसायटीच्या विविध महाविद्यालयातील पदवी व पदव्युत्तर परीक्षेत प्रथम क्रमांकाने उत्तीर्ण झालेल्या गुणवंत विद्यार्थ्यांचा गौरव समारंभ आज (शनिवार, दि. ७ डिसेंबर २०२४) म.ए.सो. आबासाहेब गरवारे महाविद्यालयाच्या सभागृहात आयोजित करण्यात आला होता. या वेळी ते बोलत होते. डॉ. मोहितकर यांच्या हस्ते चाळीस गुणवंत विद्यार्थ्यांचा गौरव करण्यात आला.
महाराष्ट्र एज्युकेशन सोसायटीचे अध्यक्ष एअर मार्शल भूषण गोखले (निवृत्त) कार्यक्रमाच्या अध्यक्षस्थानी होते. संस्थेचे उपाध्यक्ष प्रदीप नाईक यांची या वेळी विशेष उपस्थिती होती. संस्थेच्या नियामक मंडळाचे अध्यक्ष बाबासाहेब शिंदे आणि सहाय्यक सचिव सुधीर भोसले या वेळी व्यासपीठावर उपस्थित होते. राज्याचे तंत्रशिक्षण सहसंचालक डॉ. डी. व्ही. जाधव या कार्यक्रमाला आवर्जून उपस्थित होते.
डॉ. मोहितकर पुढे म्हणाले, “आज गौरवण्यात आलेला प्रत्येक विद्यार्थी उच्च शिक्षणात यश मिळाल्यानंतर आपल्या निवडलेल्या क्षेत्रात कार्यरत आहे, हे महाराष्ट्र एज्युकेशन सोसायटीच्या महाविद्यालयांमधील शिक्षणाच्या प्रक्रियेचे यश आहे, त्यामुळे सर्व प्राध्यापक कौतुकास पात्र आहेत. राष्ट्रीय शिक्षण धोरणामुळे आपण साचेबद्ध शिक्षण व्यवस्थेकडून लवचिक शिक्षण व्यवस्थेकडे जात आहोत. विद्यार्थ्यांना विषय निवडचे विविध पर्याय उपलब्ध झाले आहेत. शिक्षकवर्गासाठी हे मोठे आव्हान आहे, नवनवे विषय आत्मसात करत राहणे त्यांच्यासाठी अनिवार्य झाले आहे.”
कार्यक्रमाच्या प्रास्ताविकात बाबासाहेब शिंदे म्हणाले, “महाराष्ट्र एज्युकेशन सोसायटीला गुणवंत विद्यार्थ्यांची मोठी परंपरा लाभली आहे. या विद्यार्थ्यांनी देशविदेशात नांवलौकिक मिळविला आहे. आजचा गौरव समारंभ हा पुढील पिढीतील विद्यार्थ्यांना प्रेरणा देणारा आहे. संस्था कायमच कालानुरुप शिक्षण देताना सातत्याने नवनवे उपक्रम सुरू करीत आली आहे. लवकरच संस्थेचे लॉ कॉलेज आणि इंजिनियरींग कॉलेज सुरू होत आहे. क्लस्टर युनिव्हर्सिटी स्थापन करण्यासाठी संस्था प्रयत्नशील आहे.”
, “शिक्षण हा एक प्रवास आहे, त्यामुळे सातत्याने शिकत राहिले पाहिजे. महाराष्ट्र एज्युकेशन सोसायटी केवळ शिक्षण देत नाही तर संस्कार देते. त्यामुळे आजचे विद्यार्थी भविष्यात देशाचे नेतृत्व करणार आहेत, ” असे एअर मार्शल भूषण गोखले (निवृत्त) अध्यक्षीय भाषणात म्हणाले.
सुधीर भोसले यांनी आभार प्रदर्शन तर देवकी भिसे यांनी कार्यक्रमाचे सूत्रसंचालन केले.
