महाराष्ट्र एज्युकेशन सोसायटीच्या ‘मएसो कलावर्धिनी’च्या माध्यमातून आयोजित करण्यात आलेल्या ‘स्वरवेध’ लोकगीत गायन स्पर्धेचे उद्घाटन सुप्रसिद्ध गायिका आरती कुंडलकर व सुप्रसिद्ध संवादिनी वादक सुयोग कुंडलकर यांच्या हस्ते सोमवार, दि. २३ फेब्रुवारी २०२६ रोजी करण्यात आले. कार्यक्रमाच्या अध्यक्षस्थानी ‘मएसो’च्या नियामक मंडळाच्या उपाध्यक्ष व उद्योजिका सौ. आनंदीताई पाटील उपस्थित होत्या. याप्रसंगी ‘मएसो कलावर्धिनी’ चे अध्यक्ष डॉ. दिलीप शेठ व महामात्र डॉ. गोविंद कुलकर्णी व्यासपीठावर उपस्थित होते.

पूर्व प्राथमिक (इ. १ ली ते ४ थी), प्राथमिक (इ. ५ वी ते ७ वी) आणि माध्यमिक (इ.८ वी ते ११ वी) अशा तीन गटात ही स्पर्धा आयोजित करण्यात आली असून त्यामध्ये कीर्तन, भारुड, गवळण, पोवाडा या लोकगीत प्रकारांचा समावेश आहे.

या प्रसंगी बोलताना आरती कुंडलकर म्हणाल्या की, शालेय जीवनामध्ये कला शिक्षणाची नितांत गरज आहे. गायन, वादन, नृत्य इ. कला विद्यार्थ्यांमध्ये आत्मविश्वास निर्माण करतात, त्यांचे व्यक्तिमत्त्व फुलवतातत. कोणतेही सांगीतिक शिक्षण घेताना शास्त्रीय संगीताचे किमान ज्ञान असणे अत्यंत आवश्यक आहे.

सुयोग कुंडलकर म्हणाले की, ‘मएसो’ विद्यार्थ्यांवर अनेक वर्षांपासून संगीताचे उत्तम संस्कार करीत आहे. अशा स्पर्धांच्या माध्यमातून बालवयातच संगीताचे बाळकडू देत आहे.

सौ. आनंदीताई पाटील अध्यक्षीय मनोगत व्यक्त करताना म्हणाल्या की, बालवयातच विद्यार्थ्यांना ‘स्वरवेध’ हे एक उत्तम आंतरशालेय व्यासपीठ लाभले आहे. याचा लाभ सर्वांना मिळावा यासाठी भविष्यात या व्यासपीठाची व्याप्ती वाढवून अनेक कला प्रकार समाविष्ट करावेत.

प्रास्ताविकात डॉ. दिलीप शेठ म्हणाले की, ‘मएसो कलावर्धिनी’च्या माध्यमातून विविध कलांचे संस्कार विद्यार्थ्यांवर घडविणे हा ‘मएसो’चा उद्देश आहे.

चित्रकलेसाठी ‘रंगवेध’, गायन कलेसाठी ‘स्वरवेध’, वादन कलेसाठी ‘तालवेध’ आणि तसेच पुढे ‘नृत्यवेध’, ‘नादवेध’ असे उपक्रम आयोजित करण्याचा मानस आहे.

कार्यक्रमाचे आभारप्रदर्शन ‘मएसो कलावर्धिनी’चे महामात्र डॉ. गोविंद कुलकर्णी यांनी तर सूत्रसंचालन कविता चाटी यांनी केले.

स्पर्धेचे नियोजन अनिल म्हस्के यांनी केले.