नूतनीकृत गुरुवर्य डॉ. प्र. ल. गावडे सभागृहाचे डॉ. राहुल कराड यांच्या हस्ते उद्घाटन
म.ए.सो. मुलांचे विद्यालय (पूर्वीची पेरुगेट भावे स्कूल) या शाळेतील नूतनीकरण केलेल्या गुरुवर्य डॉ. प्र. ल. गावडे सभागृहाचे उद्घाटन शाळेचे माजी विद्यार्थी आणि ‘एमआयटी’चे व्यवस्थापकीय विश्वस्त व कार्यकारी अध्यक्ष मा. डॉ. राहुल कराड यांच्या हस्ते बुधवार, दि. २४ जून २०२६ रोजी करण्यात आले. महाराष्ट्र एज्युकेशन सोसायटीच्या नियामक मंडळाचे अध्यक्ष मा. श्री. बाबासाहेब शिंदे कार्यक्रमाच्या अध्यक्षस्थानी होते.
डॉ. राहुल कराड यांनी दिलेल्या भरघोस देणगीतून सभागृहात व्यासपीठ रचना, आधुनिक ध्वनियंत्रणा, दृकश्राव्य तसेच वातानुकुलन व्यवस्था निर्माण करण्यात आली आहे.
या प्रसंगी मएसो च्या नियामक मंडळाचे सदस्य व शाला समितीचे अध्यक्ष डॉ. दिलीप शेठ, एमआयटी वर्ल्ड पीस युनिव्हर्सिटीचे कुलगुरु डॉ. आर. एस. चिटणीस, ज्येष्ठ शास्त्रज्ञ डॉ. अशोक जोशी, शाळेचे महामात्र श्री. सुधीर गाडे, संस्थेचे सचिव डॉ. अतुल कुलकर्णी, म.ए.सो. मुलांचे विद्यालयाचे मुख्याध्यापक श्री. सायसिंग वसावे व्यासपीठावर उपस्थित होते.
यावेळी बोलताना डॉ. कराड म्हणाले, “देशात मोठ्या संख्येने आज शैक्षणिक संस्था उभ्या राहिल्या असल्यातरी शिक्षणाच्या क्षेत्रात पुण्याचे स्थान अबाधित आहे. पुण्याचा शैक्षणिक, सांस्कृतिक, वैचारिक पाया भक्कम आहे. पुण्यातील शिक्षण संस्था वैशिष्ट्यपूर्ण आहेत, प्रत्येकाची वेगवेगळी बलस्थाने आहेत. त्यामुळे पुण्यातील शिक्षण संस्थांनी सहयोगात्मक स्पर्धा केली पाहिजे, त्यामुळे विद्यार्थ्यांमध्ये अनेक विषयांची जाण निर्माण होईल आणि त्यांची सृजनशीलता, रचनात्मक मानसिकता जोपासता येईल.”
मा. श्री. बाबासाहेब शिंदे आपल्या अध्यक्षीय भाषणात म्हणाले, “महाराष्ट्र एज्युकेशन सोसायटी ही स्वातंत्र्यपूर्व काळात भारतीयांनी सुरु केलेली आणि १६५ वर्षांनी देखील अखंडपणे कार्यरत असलेली एकमेव शिक्षण संस्था आहे. इंग्रजी माध्यमाच्या शाळांच्या रेट्यात संस्थेने मराठी माध्यमाच्या शाळा टिकवून ठेवल्या आहेत. त्यामुळेच समाजातील आर्थिकदृष्ट्या दुर्बल स्तरातील मुलांना देखील शिक्षण मिळत आहे. या विद्यार्थ्यांना कौशल्याधारित प्रशिक्षण देण्याची आवश्यकता आहे. संस्थेचे शिक्षक आणि माजी विद्यार्थी हाच संस्थेचा आधार आहे. माजी विद्यार्थी असलेल्या डॉ. राहुल कराड यांच्या उत्स्फूर्त सहकार्यामुळेच शाळेतील सभागृहाच्या नूतनीकरणाचे काम झाले आहे. त्याबद्दल मी त्यांचे आभार मानतो. शिक्षण संस्थांनी परस्पर सहकार्याने काम करण्याचा विचार डॉ. कराड यांनी मांडला आहे. महाराष्ट्र एज्युकेशन सोसायटी यासंदर्भात निश्चितच एम.आय.टी. शी सहकार्य करेल.”
कार्यक्रमाच्या प्रारंभी डॉ. दिलीप शेठ यांनी प्रास्ताविक केले. ते म्हणाले की, संस्थेने कृतज्ञता निधीसाठी केलेल्या आवाहनाला संस्थेच्या माजी विद्यार्थ्यांनी उत्स्फूर्त प्रतिसाद दिला. त्यामाध्यमातून गेल्या तीन-चार वर्षात सुमारे तीन कोटी रुपयांचा निधी उभा राहिला. माजी विद्यार्थी आपल्या शाळेसाठी काय करू शकतो? हे प्रत्यक्ष अनुभवाला आले आहे. याशिवाय विविध बॅचच्या माजी विद्यार्थ्यांनी एकत्र येऊन शाळेतील पायाभूत सुविधांमध्ये सुधारणा केल्या आणि भर देखील घातली आहे. शाळेच्या इमारतीची डागडुजी व रंगकाम, प्रयोगशाळा अद्ययावत करणे, स्वच्छतागृहातील सुधारणा, मैदानावर आधुनिक प्रकाशयोजना अशी विविध कामे माजी विद्यार्थ्यांच्या माध्यमातून झाली आहेत. त्याचबरोबर माजी शिक्षकवर्गाचे मार्गदर्शन मिळते आहे. विशेष म्हणजे प्रदीर्घ काळानंतर शाळेचा इ. १० वी च्या परीक्षेचा १००% निकाल लागला आहे. कौशल्यांचे बदलते स्वरुप लक्षात घेऊन विद्यार्थ्यांना प्रशिक्षण देण्यात येत आहे. म.ए.सो. मुलांचे विद्यालय ही संस्थेची फ्लॅगशीप शाखा आहे. नजिकच्या भविष्यात शाळा चांगल्या स्वरुपात सर्वांसमोर येईल. शाळेतील शिक्षकवर्ग त्यासाठी प्रयत्नशील आहे.
संस्थेच्या नियामक मंडळाचे आणि आजीव सदस्य मंडळाचे सदस्य, संस्थेचे मुख्य कार्यकारी अधिकारी श्री. सचिन आंबर्डेकर या प्रसंगी उपस्थित होते.
मुख्याध्यापक श्री. वसावे यांनी आभार प्रदर्शन केले.